شادي طارق يكتب .. ما الذي حدث للزمالك تحت قيادة ميتشو

الواحد مضايق و مالوش نفس يكتب حاجة عن الزمالك بصراحة و كنت مأجل الكتابة من بعد ماتشين المقاصة و الاتحاد في الدوري قولت خلي الناس تركز و الدنيا تهدي مفيش داعي نكتب عن مشاكل او نضغط علي حد إلي نهاية ماتش اف سي مصر و للأسف النفس اتسدت زيادة و لكن هقول اللي جوايا و أريح نفسي و اعذروني علي الاطالة.

مشكلتنا مش التعادل مع فريق مصر او اضاعة نقط أمامه او فلان لعب و علان ملعبش او لعبنا 4/3/3 ولا 4/4/2 .. مشكلتنا أكبر من كدة بكتير.

انا لا ليا مصادر في النادي ولا مصادر داخل الفريق ولا علي تواصل مع لاعبين ولا أي حاجة .. نفسي أعرف أو أفهم إيه اللي جرا لميتشو بعد نهائي كأس مصر أمام بيراميدز ؟!

عندي مبدأ ان لما الاقي كل لاعبي الفريق سيئين و مستواهم متراجع و بنتقدهم كلهم .. يبقي العيب في المدرب بالدرجة الأولي قبل ما يكون عيب منهم .. مش ممكن ولا معقول ولا منطقي ان الراجل اللي دربنا في 3 مباريات كأس مصر و أداء مثالي علي كافة الأصعدة من تشكيل ثابت إلي جمل فنية و تكتيكية و أسلوب لعب واضح و جميل يتحول إلي النقيض تمامًا إلي فوضي و عشوائية و عك و عجن !!

في شيء مُبهم بالنسبالي و مش مفهوم و حلقة مفقودة من يوم نهائي بيراميدز حتي الان .. و محدش يقولي النهائي كان صدفة عشان الزمالك كان رائع جدا و ممتاز و شغل فني و تكتيكي واضح في لقائي الاتحاد و المقاصة في الكأس و ختمه بتابلوه فني بديع امام بيراميدز من رابع المستحيلات دة كله يكون صدفة.

كان لينا تشكيل أساسي و هيكمل رئيسي ماشيين عليه و شكل ثابت معروف اول ما جيه.. كله اتغير لا بقة لينا شكل ولا منظر ولا تعرف مين الأساسي و مين الاحتياطي ولا تعرفلنا خطة او نظام معين او طريقة فنية ماشيين عليها!!

مفيش لاعب هيجيب مستواه وهو مبيلعبش .. واحنا في بداية موسم أي لاعب محتاج استمرارية و محتاج يلعب كتير عشان يجيب فورمة خاصة و ان غالبية الفريق لا عمل فترة اعداد ولا كان جاهز و لاعيبة كبيرة جبناها من بيتها تقريبًا و لسه مش جاهزة .. طيب هيجهزوا امتي و هما بيلعبوا ماتش و يركنوا ماتشين يلعبوا شوط و يريحوا شوط !!

الفريق تقريبًا لعب فيه في اخر 5 مباريات حوالي 26 لاعب من أصل 30 .. مصطفي فتحي و اسلام جابر و محمد حسن و الحارس الثالث صبحي فقط هما اللي ملعبوش مع الفريق .. رقم كارثي و مجنون و مفيش اي حد بيعمل كدة .. انت جاي جديد مش عامل فترة اعداد ولا شيء يبقي تثبت اللي تعرفه و تكتشف واحدة واحدة في الطريق .. لكن انت كدة بتغامر بينا و بيك شخصيًا.

لو انت مُجبر علي اختياراتك و تشكيلاتك .. اطلع افضحهم و قول و برأ نفسك عشان محدش هيرحمك .. و الحلم اللي كنت بتحلم بيه من بدري انك تدرب نادي كبير و تعمل اسم و سُمعة و صيت لنفسك هينتهي و مش هيتكررلك تاني .. ولو دي اختياراتك و قناعاتك "وانا أشك في ذلك" أرجوك راجع نفسك فيها عشان هتقضي عليك مبكرًا لإن العامل الايجابي اللي كان في صفك من اول يوم وهو الجمهور انت بدأت تفقده او فقدته بالفعل دلوقتي!

لما فاوضنا ميتشو من 3 4 سنين تقريبًا الراجل رفض بحجة رفضه التعامل مع مرتضي منصور و دة انا قولته وقت ما رشحته للنادي .. و لما جينا نستطلع رأيه تاني قبل ما اكتب تقريري عنه الراجل قال انا هعرف أتعامل معاه و متقلقوش و هقدر أقود الفريق و مش هسمح لشخص يتدخل في عملي و بناء علي كدة تم ترشيحه للنادي .. من واقع متابعتي ليه قبل كدة سواء عن قُرب او من أحد المقربين منه اللي كان علي تواصل دائم معاه .. دي لا شخصيته ولا دماغه و الله أعلي و أعلم جراله إيه.

يوم ما اترشح كان الواحد متوسم خير هيكون معاه جهاز فني كامل اجنبي بعيدًا عن العصافير و أصحاب المصالح ... لكن بتفاجيء كل يوم ان لا في مساعدين و بندور علي مدرب أحمال و عشوائية غير طبيعية توصل اني أشوف ايمن عبد العزيز و احمد عبد الرؤوف بيدوا تعليمات في أرض الملعب أكتر منه !!

- جزء اخر من المشكلة موجه للاعبين الزمالك .. انا عارف ان القدامي جميعهم لم يتقاضوا أي أموال بما فيهم المحترفين الاجانب من الموسم الماضي .. و واخدين وعود عديدة و كلها كالعادة بلا أي تنفيذ و ليهم حق يطهقوا و يزهقوا و كل واحد له التزامات و حياة و انا مقدر دة.. لكن يا رجالة احنا كا جمهور ذنبنا ايه ؟ فين حقنا عليكم ؟! يعني مباراة امبارح دي لو اتعادت 100 مرة مينفعش أبدًا أبدًا أبدًا نخسر نقط فيها و نظهر فيها بهذا الشكل المزري و السيء لا في حد بيلعب بحافز ولا روح ولا أي حاجة .. تماثيل فقط بلا أي روح او قلب الحقيقة..

- جزء و عامل كبير علي ادارة النادي .. فين مستحقات اللاعبين ؟ فين حقوقهم و ليه مستمرين في اطلاق الوعود بلا تنفيذ ؟ و ليه بنطلع نتفشخر و نتباهي بالفلوس اللي في النادي و هي مش موجودة !!! نطلع نتفشخر و نعمل أبطال شعبيين و هنتكفل بعلاج فلان و علان كا نوع من أنواع الكيد و الغيظ فقط للخصم و للأسف انت بتعمل بطولة من ورق محدش مهتم بيها غيرك وانت لاعيبتك شبعت وعود و كلام بلا طائل او عائد و محدش فيهم خد حقه عشان يديك !
حد يقدر يقولي او يفسرلي إيه سبب او سر جلوس أمير مرتضي علي دكة البدلاء و إيه دوره أصلا عشان يقعد علي الدكة وسط الجهاز الفني ؟
الأخ أمير اللي بيتخانق مع كابتن الفريق في السوشيال ميديا و قدام الملايين حد قاله بدل ما تدفع في 2 حراس بدلاء 24 مليون جنيه كان الأولي ضم لاعيبة ارتكاز للفريق بدل مااحنا بنقلع ملط و بنلطم لو طارق حامد او فرجاني غابوا عن الفريق ؟!

أخيرًا جمهورنا .. مش بنظر علي حد ولا بحجر علي رأي حد و لكن كل واحد فينا جواه مرتضي منصور .. من 3 أسابيع فقط ميتشو كان ثعلب و داهية لأ و وصل الكلام بالناس انهم خلاص قرروا ان ميتشو أفضل من جروس دلوقتي نصاب و عجلاتي و غيره من الكلام .. إمام عاشور طلعناه سابع سما و أوناجم خسفنا بيه الأرض دلوقتي بنعمل العكس .. و أمثلة تانية كتيرة .. مرتضي بيتلكك بينا .. بلاش احنا نبقي أداة يستعملها في تدمير الفريق مبكرًا و احنا لسه في بداية الموسم.

انا والله ما أعرف ايه الصح حاليًا ميتشو يمشي ولا يقعد ولا عندي حل مُعين لشيء ولكن بتمني مننهيش الموسم بدري و ندمر الدنيا و نرجع لنقطة الصفر تاني .. قدامنا 12 يوم أتمني ميتشو بما انه مكمل حاليًا يرجع لصوابه و يمشي بدماغه و كلامه و رأيه عشان الناس المسيطرة عليه هي أول ناس هتدوس عليه و هترميه بعد كدة.